عزیز تسلیم و و دوستلریم !
مسعود دن کیین ایکیته بی کفایت اوکه سی و جوده یاش اوغلی باش بولدیلر. بیرارته تاجیک سوکیب چیقمه دی. ربانی دن کیین اوغلی، هم حزب و هم چوکی سیگه ایگه بولدی . بیر تاجیک چیقیب سوکمه دی. مارشال دن کیین جوده یاش اوغلی جنراللیککه ایریشدی و پادشاهلردیک دربار سوره دی. بیرار تاجیک اونی حقارت قیلمه دی. عطا نینگ مافیالیگی، قاتللیگی، یره مس لیگی و سوادسیزلیگینی همه بیله دی. اما بیرار فرهنگی تاجیک اونگه قرشی قلم تیبرتگنی یوق.
پشتونلرنی ایتمه سم هم بوله دی. اولرنینگ بیشیک ده گی باله لری هم باش بولیب چیقه دیلر و بیسواد و قاتللری هم ۱۱۸ کتاب مؤلفی، اینگ عالی بیلیم درگاهی باش مشاوری، اوروش و حتا حربی مکتبنی کورمه گنی جنرال، سیاست الفباسینی هم اوقیمه گنی وزیر و سفیر یا فلان فلان مقام ایگه سی بولیب یوریبدی. اما بیرار پشتون اولرنی سوکمه یدی و جنایتلرینی ایتمه یدی.
بشقه لر ییرگه ییقیلیب ایاقدن قالگنلرینی قیته ایاققه تورغیزه دیلر، اما بیز بیرگینه آقسه گن یا ایندی ییقیله یاتگنیمیزنی تیپیب، ییقیلیشینی تیزلشتیره میز. نه بیراله میز و نه کوراله میز. نه اوزیمیز جیلمه یمیز، نه بشقه نی بیرار سیلجیگنی قویه میز. یوتوقلرنی کورمه یمیز و یخشی ایشلرنی ایسله مه یمیز، اما بیر یینگیلمه یا ینگلیشمه نی کورگن یا ایشیتگنیمیزده، در حال قلم و تیلیمیزنی پیچاق و قیلیچ دن اوتکیرراق قیلیب، دشمنلرچه انتقاد قیله باشله یمیز. یمانی هم شونده که فارسچه ده یازه میز و اوزیمیزنی دشمنلرگه کولگیلیک مخلوق قیلیب کورسته میز و حتا یاتلریمیز تبرلریگه دسته نی اوزیمیز تیارلب بیره میز.
فقط بیزاوزبیکلر و عموم تورکلر، اوزیمیزنی تحقیرلب یوره میز!
فقط بیز، علوم دکتوراسی بولگن پروفیسوریمیزنی هم، عمرینی اوریش و سپاهیگرلیکده اوتکزگن سرکرده میزنی هم، یاش اما باش بولگنیمیزنی هم، کیکسه اما حالی هم کوچ- قوتگه توله بولگن کدرلریمیزنی هم هیچ قچان قبول قیله آلمه یمیز. بیز انتقاد قیله میز و اما یول کورسه تیش و توغری مصلحت بیریشنی بیلمه یمیز.
تورکلرده یاشلیکده سرکرده و حتا پادشاه بولیش مثاللری آز ایمس. امیرتیمور یکه اوزی، هیچ بیر حامیسی و یار و یاردمچیسی بولمه گن حالده، انچه یاشلیگیده عصیان قیلدی و عادی عسکرلیکدن یینگیلمس فاتح و قدرتلی امپراطور بولیشگه ایریشدی. بابرشاه ۱۴ یاشیده پادشاه بولیب، ایچکی و تشقی دشمنلرگه دوچ کیلیب، آخری افغانستان و هندوستاننی آلیب، کورگانی پارلاق مدنیت و سلاله سینی قوردی.
بیلمه یمن قنداق قیلیب اوچ یوزییل دوام ایتگن و حدودی کون چیقردن کون باترگچه بولگن عظمتلی امپراطورلیکلرنی قورگن ایکنمیز؟
نیگه حاضرگی پیتده، شونداق یمان و آغیر وضعیت ده، یاتلردن تورلی یاووزلیکلر باشیمیزگه یاغیب تورگن بیر چاغده، بیر بیریمیزنی قوللب یاردم بیریش اورنیگه بیر بیریمیزنی ییقیتیش و ینچیش بیلن مشغول میز؟
شو سونگی کونلرده چین دن هم اوزیمیزو احوالیمیزگه قره ب، اچینه من. نیگه بیز شونچه لیک اوزیمیزگه قرشیمیز؟
کیلینگ آزگینه کیچیریملی، آزگینه صبرلی، آزگینه کینگ یوره کلی، آزگینه متحد و متفق بوله یلیک!
شفیقه یارقین
۱۲ مارچ ۲۰۱۷
سایت شبکه اطلاع رسانی ترکستان با رعایت اصل دموکراسی و آزادی بیان درعرصه ی مطبوعات و رسانه های انتر نیتی ساخته شده و تلاش می ورزد که در راستای زنده گی برابر و قانونمند میان شهروندان جامعه، از نظر جنسیتی، قومی زبانی، مذهبی و گرایشهای فکری نشرات داشته باشد. تا اکنون به این دید گاه باورمندانه پیش رفته و نیز نظریه احترام به باور ها و اقوام و مذاهب، در رأس برنامه ی نشراتی و اعتقاد ی آن قرا ر دارد.